Жастардың репродуктивті денсаулық мәселесіне қызығушылығы артқан

Елімізде жастардың репродуктивті денсаулық мәселесіне деген қызығушылығы (2022 жылмен салыстырғанда) 24,7%-ға артты.

Астанада «Жастар денсаулығын сақтау» тақырыбында республикалық форум өтті. Онда Medical Youth Ball белсенділері биыл атқарған жұмысының нәтижесін таныстырды. Олардың мәліметінше, жас қазақстандықтардың репродуктивті денсаулық мәселелеріне деген қызығушылығы едәуір артқан.

Сауалнаманың негізгі көрсеткіштері «Қазақстан жастары – 2022» ұлттық баяндамасында келтірілген деректермен салыстырсақ, осы кезеңде репродуктивті денсаулық тақырыбына қызығушылық танытқан жастардың үлесі 44,2%-дан 68,9%-ға дейін артқанын көрдік. Әсіресе, өсім ауыл жастары арасында байқалды. Мұнда көрсеткіш 32,2%-дан 48,3%-ға дейін көтерілген», – деді «Жастар денсаулығын сақтау – Saulyq.life» қозғалысының жетекшісі Қанат Мырхайдаров.

Оның айтуынша, жастар бұл тақырыпқа қызығушылық танытып қана қоймай, белсенді түрде ақпарат көзін іздеген. Мұны арнайы анонимді Telegram ботына келетін сұраныстың артуы дәлелдеп отыр. 1,5 жылда қозғалыстың психологтары мен медициналық мамандары жастардың 350-ден астам өтінішін қараған.

Telegram-дағы Saulyq life ботының көмегімен жас қазақстандықтар мамандардан тәулік бойы тегін кеңес алды. Олардың басым бөлігі – 15-22 жас аралығында. Жасөспірімдер мен жастарды көбіне етеккірдің келуі, либидоның өзгеруі, жыныстық денсаулық және басқа мәселелерге қатысты тақырыптар қызықтырды, — деді Қанат Мырхайдаров.

Бүгінде жобаға 2 мыңнан аса ерікті белсенді түрде қатысып жатыр. Барлығын кәсіби мамандар оқытқан.

Еліміздің әр өңірінде қозғалыс көшбасшысын даярлауға арналған оқыту курсын ұйымдастырдық. Әлеуетті волонтерлер ЖЖБИ алдын алуға, жүктілік пен репродуктивті денсаулыққа теріс факторларға қатысты мәселені зерттеді. Әр аймақта ең үздік нәтиже көрсеткен 50 қатысушы қозғалыстың тәлімгері атанды. Олар өз облысындағы ауылдарда түсіндіру жұмысын жүргізеді. Жасөспірімдер ересектерге қарағанда өз құрдастарына көбірек сенетіндіктен біз осы модельді ең тиімді амал деп білеміз, — деді қозғалыс жетекшісі.

Айта кетейік, форум аясында волонтерлер үшін доцент, уролог-андролог дәрігерлер мен жастар қозғалысы үйлестірушілері тренингтер ұйымдастырды.