Байзақ ауданында этномәдени бірлестіктер өкілдерінің қатысуымен «Сыбайлас жемқорлыққа қарсы мәдениет: қоғамның ортақ жауапкершілігі» тақырыбында маңызды кездесу өтті.

Іс-шараның негізгі мақсаты – қоғамда сыбайлас жемқорлыққа қарсы мәдениетті қалыптастыру, азаматтардың құқықтық сауаттылығын арттыру, сондай-ақ адалдық, әділдік және жауапкершілік қағидаттарын кеңінен насихаттау. Бүгінде сыбайлас жемқорлыққа қарсы іс-қимыл тек мемлекеттік органдардың ғана емес, бүкіл қоғамның ортақ міндеті болып табылады. Осыған орай, кездесуде қоғамдағы әрбір азаматтың, қоғамдық ұйымдардың және этномәдени бірлестіктердің атқаратын рөлі кеңінен талқыланды.

Кездесудің спикері – «Әділдік жолы» республикалық қоғамдық бірлестігінің Жамбыл облыстық филиалының жетекшісі Назима Дәрменқызы. Ол өз сөзінде сыбайлас жемқорлықтың қоғам дамуына тигізетін кері әсеріне тоқталып, құқықтық мәдениетті қалыптастыру мен қоғамдық бақылауды күшейтудің маңыздылығын атап өтті. Сонымен қатар, азаматтардың құқықтары мен міндеттері, сыбайлас жемқорлық фактілерінің алдын алу және оған мүлдем төзбеушілік қағидатын қалыптастыру жөнінде жан-жақты ақпарат берілді.

Кездесу барысында қатысушылар өз ой-пікірлерін білдіріп, қоғамдағы ашықтық пен әділдікті қамтамасыз ету, жастар арасында парасаттылық құндылықтарын дәріптеу және азаматтық жауапкершілікті арттыру бағытында ұсыныстарын ортаға салды. Этномәдени бірлестіктер өкілдері қоғамдық келісім мен бірлікті нығайту арқылы адал қоғам қалыптастыру ісіне үлес қосуға дайын екендіктерін жеткізді.

Іс-шараны «Адал қоғам» қоғамдық бірлестігі ұйымдастырды. Мұндай кездесулер қоғамда сыбайлас жемқорлыққа қарсы көзқарасты қалыптастыруға, заң үстемдігін нығайтуға және азаматтардың белсенді ұстанымын дамытуға ықпал етеді.

#БайзақАуданы #СыбайласЖемқорлыққаҚарсы #ӘділдікЖолы #АдалҚоғам #Парасаттылық #ЭтномәдениБірлестіктер #ЗаңҮстемдігі #АдалАзамат