Instagram арқылы 1,3 млрд теңге жиналған: Тотақановтар отбасына алаяқтық бойынша айып тағылды

Астанада Тотақановтар отбасына қатысты алаяқтық және заңсыз жолмен алынған табысты заңдастыру фактісі бойынша қылмыстық іс қаралып жатыр. Тергеу мәліметінше, 2020–2024 жылдар аралығында отбасы мүшелері Instagram желісіндегі @altair_tota парақшасы арқылы баласының ауыр дертіне байланысты жалған қайырымдылық науқанын ұйымдастырған.

Азаматтардан жиналған 1,3 млрд теңгеден астам қаржы емге емес, құмар ойындарға, сәнді киім-кешекке, шетел сапарларына және басқа да жеке тұтынуға жұмсалғаны анықталды. Ақша Тотақанова, оның анасы және 2021 жылы қайтыс болған әжесінің атына ашылған шоттар арқылы қозғалған.

Қазір айыпталушыларға ҚР ҚК:

• 190-бабының 4-бөлігі, 2-тармағы – “Аса ірі көлемде жасалған алаяқтық”;

• 218-бабының 2-бөлігі, 1-тармағы – “Қылмыстық кірістерді заңдастыру” бойынша айыптар тағылған.

Іс Астананың Қылмыстық істер жөніндегі мамандандырылған ауданаралық сотында қаралуда.