📅 29 мамыр – Біріккен Ұлттар Ұйымының Халықаралық бітімгерлер күні. Бұл дата – әлемнің түкпір-түкпірінде тұрақтылық пен бейбітшілік орнату жолында қызмет атқарып жүрген әскери және азаматтық мамандардың еңбегіне көрсетілетін құрмет.
2014 жылдан бастап 750-ден астам қазақстандық әскери қызметші БҰҰ аясындағы бейбітшілік миссияларына қатысып келеді. Олар Судан, Ливан, Батыс Сахара және Орталық Африка Республикасы сынды елдерде тұрақтылықты қамтамасыз ету жолында жоғары кәсіби дайындық пен жанқиярлық танытты.
Қазақстан ТМД кеңістігінде БҰҰ-ның бейбітшілік миссиясына жеке мандатпен қатысқан алғашқы және жалғыз ел ретінде халықаралық аренада ерекше мәртебеге ие болды. Бұл – еліміздің жаһандық бейбітшілікті нығайтуға бағытталған нақты саясатының айғағы.
2018 жылы қазақстандық әскери контингенттің Голан жоталарында БҰҰ-ның «Күшейтілген бақылау миссиясы» аясында қызмет атқаруы – Қарулы Күштеріміздің жоғары деңгейдегі дайындық пен жауапкершілікті көрсетті.
Президент Қасым-Жомарт Тоқаев бітімгерлерді марапаттау рәсімінде былай деген еді:
«Сіздер ең күрделі жағдайда да қазақстандық әскери қызметшілердің тиімді қызмет ете алатынын дәлелдедіңіздер. Бұл – еліміздің қауіпсіздігін қамтамасыз етіп, Қазақстанға деген сенімді нығайтатын маңызды қадам».
Қазақстандық бітімгерлердің қызметі – жас буынға үлгі болатын ерлік пен адалдықтың жарқын мысалы. Олардың миссиясы халықаралық қауымдастық тарапынан жоғары бағаланып, еліміздің бейбітсүйгіш саясатының нақты нәтижесі ретінде танылуда.
