Жамбыл облысы – тарих пен табиғаттың керемет үйлесімі. Көне өркениеттердің ізі қалған бұл мекен туристер үшін нағыз ашылмаған қазына. ЮНЕСКО-ның Бүкіләлемдік мұралар тізіміне енген археологиялық ескерткіштер, көздің жауын алатын шатқалдар, адреналин іздегендерге арналған экстремалды маршруттар – мұның бәрі дәл осында!
Тараз – қолөнердің астанасы
Тараз қаласы Дүниежүзілік қолөнершілер қалалары тізіміне енгеннен бері, өңірде бірегей қолөнер орталықтары жанданып, «Шебер шаңырақ», «Өшпес мұра», «Qoloner Taraz» сияқты қауымдастықтар құрылды. Қолөнерден естелік алғыңыз келсе, Тараздағы шеберлерден артық ешкім жасай алмайды!
Туристер ағыны 138%-ға артты!
2024 жылдың қорытындысы бойынша Жамбыл облысына 151 110 турист келген. Бұл – өткен жылмен салыстырғанда 138%-ға артық. Қонақтардың дені – еліміздің тұрғындары, алайда шетелдік туристер саны да артып келеді. Бұл Жамбыл өңірінің туристік әлеуеті жоғары екенін тағы бір мәрте дәлелдеді.
Туризмді дамытудың жаңа стратегиясы
Туристік ақпараттық орталық өңірдің имиджін жаңа деңгейге көтеруді қолға алды. Басты бағыттар:
•Жамбыл облысын халықаралық деңгейде таныту
•Экологиялық және экстремалды туризмді дамыту
•Цифрлық инновацияларды енгізу
•Қауіпсіз әрі қолайлы саяхат үшін инвестиция тарту
•Жаңа заманға сай техникалық жабдықтармен қамтамасыз ету
Алдағы уақытта облыс аумағында ЮНЕСКО құрамына енетін геопарк құру да жоспарлануда. Бұл – табиғат пен мәдени мұраны сақтауға арналған ауқымды жоба болмақ.
Аталған мәліметті Жамбыл облысы әкімдігінің кәсіпкерлік және индустриалды-инновациялық дамыту басқармасының «Тараз-Туризм» туристік ақпараттық орталығының директоры Уразалиева Мөлдір айтты.
Егер тарихи орындарды аралап, табиғат аясында тынығып, нағыз шытырман оқиғаға толы демалыс өткізгіңіз келсе, сізге міндетті түрде Жамбыл облысына келу керек!
