Қазақстанда соңғы он жылда жасөспірімдер қылмысы үш есеге азайған. Бұл туралы Оқу-ағарту министрлігінің баспасөз қызметі мәлімдеді. Биылғы жылдың алғашқы ведомствоаралық комиссия отырысы ҚР Оқу-ағарту министрлігінде өтіп, кәмелетке толмағандар арасындағы құқық бұзушылықтардың алдын алу және балалардың қауіпсіздігін қамтамасыз ету мәселелері талқыланды.
Ресми деректерге сүйенсек, қылмыстық көрсеткіштердің тіркелуі мен анықталу деңгейі артқанына қарамастан, 2024 жылдың қорытындысы бойынша жасөспірімдер қылмысы 5%-ға төмендеген. Бұл оң динамика құқық қорғау органдары мен білім беру жүйесінің бірлескен алдын алу шараларының нәтижесі болып отыр.
Дегенмен, Жетісу, Ұлытау, Павлодар, Ақмола, Қарағанды облыстарында және Астана мен Шымкент қалаларында әлі де қосымша шешімдер мен нақты әрекеттер қажет. Ішкі істер министрлігінің өкілдері кәмелетке толмағандар арасында құқық бұзушылықтардың алдын алу мақсатында кешенді жұмыстар жүргізіліп жатқанын айтты.
Комиссия отырысында әлеуметтік ортаның тез өзгеруі ата-аналар мен мемлекеттік органдардың бірлескен күш-жігерін талап ететіні айтылды. ҚР Оқу-ағарту министрлігінің Балалардың құқықтарын қорғау комитеті өз тарапынан талдамалық материалдарды ұсынып, құқыққа қарсы әрекеттердің себептерін анықтауға бағытталған ұсыныстар жасады.
Министр Ғани Бейсембаев жиынды қорытындылай келе, жергілікті атқарушы органдарға құқықтық ағарту, тәрбиелік шаралар және жасөспірімдердің бос уақытын тиімді ұйымдастыру жұмыстарын күшейтуді тапсырды. Сонымен қатар, мектептердегі ата-аналарға арналған педагогикалық қолдау орталықтары мен аймақтық психологиялық қызметтердің жұмысын жандандырудың маңыздылығын ерекше атап өтті. Бұл бастамалар жастардың әлеуметтік ортаға сәтті бейімделуін қамтамасыз етуге бағытталған.
