Биыл су тасқынынан зардап шеккен 36,4 мыңнан астам отбасына 100 АЕК мөлшерінде біржолғы әлеуметтік көмек көрсетілді.
Үкімет баспасөз қызметінің мәліметінше, су тасқыны салдарынан мүлкі зақымданған азаматтарға жан-жақты көмек көрсетіліп, өңірлерде тұрғын үйлер, әлеуметтік нысандар және инфрақұрылым салу және қалпына келтіру жұмыстары жүргізілген.
36 455 отбасына жалпы сомасы 13,3 млрд теңге 100 АЕК мөлшерінде бір реттік әлеуметтік көмек көрсетілді. 21 876 отбасына 9,9 млрд теңге көлемінде 150 АЕК-ке дейінгі өтемақы төленді. Биылғы төтенше жағдай жарияланған су басқан аймақтарда атаулы әлеуметтік көмек төлеу жергілікті комиссияның отбасылардың материалдық жағдайын тексерусіз автоматты түрде ІІІ тоқсанға ұзартылды. Мұндай шешім нәтижесінде 3,6 мың отбасына 655,7 млн теңге көлеміндегі АӘК төлемі тағайындалды, – делінген хабарламада.
Тасқын кезінде зардап шеккен өңірлерде комиссиялар азаматтардың жалғыз баспанасы саналатын 19 359 су басқан үйлер мен саяжай құрылыстарын тексерді. Оларды баспанамен қамтамасыз ету мақсатында жылжымайтын мүлік нарығынан 5 767 тұрғын үй сатып алынды. Жөндеу жұмыстары 9 156 үйде немесе 100% аяқталды. Бұл мақсаттарға барлығы 54,7 млрд теңге бөлінді. Сондай-ақ қысқа мерзімде 64 млрд теңгеге тұрғындар үшін 2 680 жеке тұрғын үй салынды.
