Бүгін — қазақ музыка өнерінің алыбы, композитор, дирижер, дәулескер домбырашы, Халық қаһарманы Нұрғиса Тілендиевтің туғанына тура 100 жыл.
Ұлт руханиятының ұлы тұлғасы 1925 жылдың 1 сәуірінде Алматы облысы, Іле ауданында дүниеге келген. Ол — ұлттық өнердің өрісін кеңейткен, замана үнімен үндестіре білген бірегей композитор, қазақтың төл музыкасын жаңа белеске көтерген дара дарын.
Өнер жолындағы ұзақ жылдар ішінде Нұрғиса Атабайұлы Абай атындағы Қазақ мемлекеттік академиялық опера және балет театрында дирижер, Құрманғазы атындағы халық аспаптар оркестрінде бас дирижер, «Қазақфильм» киностудиясында музыка редакциясының басшысы қызметтерін атқарды. Ал 1981 жылы өзі құрған «Отырар сазы» фольклорлық-этнографиялық ансамблі оның шығармашылық шыңын айқындап берді. Бұл ұжымның негізін қалаушы әрі көркемдік жетекшісі ретінде Нұрғиса Тілендиев ұлттық аспаптарды сахналық өнердің жаңа деңгейіне көтерді.
Композитор «Алтын таулар» операсы (Қ.Қожамияровпен бірге), «Достық жолымен» балеті (Л.Степановпен бірге), «Ортеке» балет-поэмасы, «Менің Қазақстаным» кантатасы, «Ата толғауы», «Аққу», «Арман», «Көш керуен» секілді оркестрге арналған күрделі поэмаларымен қазақ музыкасының алтын қорын байытты. Сонымен қатар, ол 400-ге жуық ән мен романс, 50-ден астам драмалық қойылымға, 19 көркем фильмге, 17 мультфильмге және 14 деректі фильмге музыкалық сүйемел жазған.
