Қазақстанның Тұңғыш Президенті Нұрсұлтан Назарбаев мінген әйгілі Mercedes-Benz S600 Guard көлігі тағы да сатылымға шықты. 1993 жылы Германияда арнайы тапсырыспен шығарылған бұл брондалған көлік мемлекет басшылары үшін құрастырылған. Бағасы өзгермеген – 222 миллион теңге.
Kolesa.kz сайтында жарияланған хабарландыруда сатушы көліктің тарихи құндылығын ерекше атап өтеді. Жүрісі небәрі 38 мың шақырымды құрайтын темір тұлпар – GUARD B7 деңгейінде қорғалған, яғни автомат оғынан да аман шыға алады.
Сатушының айтуынша, дәл осы модель кезінде Грузияның экс-президенті Эдуард Шеварднадзені қастандықтан аман алып қалған. Ал Ресей президенті Владимир Путиннің осындай көлігі жылдар бұрын 1,3 миллион еуроға сатылған.
Айта кетейік, бұл көлік бұған дейін де сатылымға шыққан болатын. Ол кезде де бағасы – 222 миллион теңге болған.
