Біріккен Ұлттар Ұйымының ұшағы Сомалидің астанасы Могадишо әуежайына алдыңғы шассидегі ақауға байланысты авариялық қону жасауға мәжбүр болды. Бұл туралы БҰҰ ресми сайтында хабарланды.
Әуе кемесі Могадишодан Байдабо қаласына бағыт алған сәтте, экипаж шасси жүйесіндегі ақауды байқап, қауіпсіздік мақсатында кері бұрылу туралы шешім қабылдаған. Қону барысында ұшақтың алдыңғы шассиі ашылмай қалғандықтан, апаттық жағдай орын алды.
Ұйымның мәліметінше, бортта 17 БҰҰ қызметкері болған. Эвакуация сәтінде бір жолаушы жеңіл жарақат алған, қалған жолаушылар мен экипаж мүшелері аман-есен.
Оқиғаға қатысты тергеу амалдары жүргізіліп жатыр. Ұшақтың нақты техникалық жағдайы мен ақаудың себебі арнайы комиссия арқылы анықталатын болады.
