2026 жылғы 18 наурыз күні ҚХП Жамбыл облыстық филиалының ұйымдастыруымен «Болашақты бірге құрамыз: референдум қорытындылары және алдағы қадамдар» тақырыбында қоғамдық-сараптамалық кездесу өтті. 
Маңызды жиынды ҚХП Жамбыл облыстық филиалының төрағасы Р.С. Аққозиев ашып, референдумның ел болашағы үшін айрықша мәнге ие екенін атап өтті.
«Референдум – халықтың өз таңдауын айқын білдіретін маңызды саяси құрал. Бүгінгі кездесудің мақсаты – сол таңдаудың нәтижелерін талдап қана қоймай, оны нақты істерге айналдыру жолдарын бірге қарастыру», – деді Р.С. Аққозиев.
Кездесуге мемлекеттік органдардың өкілдері, кәсіпкерлер, білім беру саласының мамандары, қоғамдық ұйым мүшелері мен сарапшылар қатысып, ашық пікір алмасу алаңы қалыптасты.
Күн тәртібіндегі негізгі бағыттар:
– референдум қорытындыларының мазмұны мен маңыздылығы;
– қабылданған шешімдерді өңірлік деңгейде жүзеге асыру тетіктері;
– Жамбыл облысының әлеуметтік-экономикалық дамуына бағытталған бастамалар;
– қоғам мен билік арасындағы өзара іс-қимылды күшейту.
Жиын барысында қатысушылар өз ұсыныстарын ортаға салып, өңірдің өзекті мәселелерін шешу жолдарын талқылады. Сарапшылардың пікірінше, референдум нәтижелері қоғамдағы жаңғыру үдерістеріне серпін беріп, халық пен мемлекет арасындағы сенімді нығайта түседі.
Кездесуде сөз алған Тараз қаласы мәслихатының депутаты Қарлығаш Жалғасқызы:
«Мұндай форматтағы кездесулер әртүрлі сала өкілдерінің пікірін тоғыстырып, ортақ шешім қабылдауға мүмкіндік береді. Бұл – өңірдің тұрақты дамуы үшін өте маңызды», – деп атап өтті.
Жиын қорытындысында алдағы кезеңде жүзеге асырылатын нақты ұсыныстар пысықталып, оларды кезең-кезеңімен іске асыру қажеттігі айтылды.
Аталған іс-шара қоғам мен билік арасындағы ашық диалогты нығайтып, Жамбыл облысының дамуына бағытталған тиімді алаң ретінде өз маңызын көрсетті.
