Қазақстанда жаздың алғашқы күні ауа райы күрт құбылып, бірқатар өңірде аптап ыстық, найзағай, бұршақ және қатты жел күтіледі. Осыған байланысты «Қазгидромет» мамандары 1 маусымға арналған дауылды ескерту жариялады.
Синоптиктердің мәліметінше, елдің оңтүстігі мен оңтүстік-шығысында ауа температурасы 40 градусқа дейін көтеріледі. Ең жоғары температура Жамбыл және Түркістан облыстарында тіркелмек. Бұл өңірлерде күндіз ауа 38-40 градусқа дейін ысиды.
Сонымен қатар Жетісу, Алматы, Қарағанды, Павлодар және Абай облыстарында да 35-39 градус аралығында қатты ыстық болады деп болжануда. Талдықорған, Қонаев, Алматы, Семей және Павлодар қалаларында да жоғары температура сақталады.
Алайда аптап ыстықпен қатар көптеген өңірде тұрақсыз ауа райы күтіледі. Атырау, Ақмола, Ақтөбе, Қостанай, Солтүстік Қазақстан, Батыс Қазақстан, Ұлытау, Қызылорда және Маңғыстау облыстарында жаңбыр жауып, найзағай ойнайды. Кей жерлерде бұршақ түсіп, дауыл тұруы мүмкін.
Ең күрделі жағдай Батыс Қазақстан облысында қалыптасуы ықтимал. Мұнда қатты жаңбыр, бұршақ және дауыл болжанып отыр. Ал Маңғыстау облысында нөсер жаңбыр мен бұршақ күтіледі.
Желдің күшеюі де бірнеше өңірде қауіп төндіруде. Жетісу облысындағы Алакөл маңында жел екпіні секундына 23-28 метрге дейін жетуі мүмкін. Осындай жел Түркістан, Жамбыл және Солтүстік Қазақстан облыстарының кей аудандарында да күтіледі.
Синоптиктер тағы бір маңызды қауіпке назар аударды. Қызылорда, Жетісу, Қарағанды, Түркістан, Маңғыстау, Павлодар, Абай және басқа да бірнеше өңірде жоғары және төтенше өрт қаупі сақталып отыр.
Ірі қалалар бойынша болжамға сәйкес, Астана, Шымкент, Тараз, Қарағанды және Павлодарда жаңбыр мен найзағай күтіледі. Ал Алматыда күн қатты ысып, ауа температурасы 35 градусқа дейін көтеріледі.
Мамандар тұрғындарды ауа райының күрт өзгеруіне дайын болуға, күннің ыстық уақытында ұзақ уақыт сыртта жүрмеуге және өрт қауіпсіздігі талаптарын қатаң сақтауға шақырды.
