Франция президенті Эммануэль Макрон мен оның жары Брижит Макрон америкалық танымал блогер Кэндис Оуэнсті ар-намысқа тиіп, жалған ақпарат таратқаны үшін сотқа берді. Тиісті арыз АҚШ-тың Делавэр штатының Жоғарғы сотына жолданған.
Макрондар блогердің Брижитті «бұрынғы ер адам – Жан-Мишель Тронье» деп атағаны үшін шағым түсіріп отыр. Бұл сөздер әлеуметтік желіде жария түрде таралған.
Кэндис Оуэнс – АҚШ-тағы ең танымал консервативті блогерлердің бірі. Оның X (бұрынғы Twitter) желісінде 6,9 миллион және YouTube-та 4,5 миллион жазылушысы бар.
Айта кетейік, Брижит Макрон жайлы мұндай қауесеттер бұған дейін де желіде тараған. Ал 2017 жылғы президент сайлауында Эммануэль Макронның жыныстық ориентациясы туралы да әртүрлі спекуляциялар болған.
