2025 жылғы қаңтарда Қызылорда облысы, Жақсықылыш ауылындағы тұз өңдеу зауытында түнгі ауысым кезінде ауыр өндірістік жазатайым оқиға тіркелді. Цехта оператор болып жұмыс істеген әйелді тұз тасымалдайтын жүк көтергіш қағып кеткен.
Жәбірленуші ауыр жарақат алып, бірнеше күрделі отадан кейін көру және қозғалу қабілетінен айырылды. Қазіргі уақытта оған күнделікті медициналық көмек қажет, оның ішінде бет-әлпеті мен көзіне шұғыл операция қажет екені белгілі болды. Әйелдің екі кішкентай баласы бар.
Сот материалдарына сәйкес, жұмыс беруші тараптан еңбек қауіпсіздігі талаптарының сақталмауы анықталған. Арнайы тергеу нәтижесінде жұмыс беруші 100 пайыз кінәлі деп танылды. Бұл жайт бойынша ҚР Қылмыстық кодексінің 156-бабы 2-бөлігі («Еңбекті қорғау қағидаларын бұзу») бойынша қылмыстық іс қозғалып, сотқа дейінгі тергеу амалдары жүргізілуде.
Сот барысында талап қоюшы физикалық және психикалық азап шеккенін, еңбекке қабілеттілігін жоғалтқанын және отбасылық жағдайының күрт нашарлағанын дәлелдеді. Жұмыс беруші жәбірленушіге 850 мың теңге көлемінде біржолғы материалдық көмек көрсеткенін және медициналық шығындарды өтеуге дайын екенін мәлімдеді.
Алайда Арал аудандық соты жәбірленушінің ауыр халін ескере отырып, моральдық зиян үшін жұмыс берушіден 5 000 000 (бес миллион) теңге көлемінде өтемақы өндіріп алу туралы шешім шығарды.
Сот шешімі заңды күшіне енді.
