Қазақстанда спорт саласын басқаруға арналған бірыңғай цифрлық платформа іске қосылды
Қазақстанда спорт саласын басқаруға арналған бірыңғай цифрлық жүйе іске қосылды. Үкімет отырысында Туризм және спорт министрі Ербол Мырзабосынов «E-спорт: дене шынықтыру және спортқа арналған цифрлық платформа» жобасының жүзеге асу барысын таныстырды.
Министрдің айтуынша, платформа спорт саласындағы басқару процестерінің ашықтығын арттырып, деректерді орталықтандыруға және барлық қатысушылар арасындағы өзара байланысты жеңілдетуге бағытталған. Жаңа жүйе федерациялар, спорт ұйымдары мен мемлекеттік органдарды бір цифрлық кеңістікке біріктіреді, ал азаматтар спорт саласына қатысты қызметтер мен ақпаратты онлайн форматта ала алады.
Пилоттық кезеңде платформаға үш негізгі модуль енгізілді. Біріншісі – спортшылардың, жаттықтырушылардың және төрешілердің кәсіби деректерін, жетістіктері мен біліктілігін қамтитын электрондық төлқұжат. Екіншісі – жарыстар, оқу-жаттығу жиындары мен турнирлер кестесін қалыптастыруға мүмкіндік беретін спорттық іс-шаралардың цифрлық күнтізбесі. Үшінші модуль – елдегі спорт нысандарының ашық есебін жүргізуге арналған тізілім.
Қазіргі уақытта жүйе тестілеу кезеңінен өтуде. Пилоттық жобаға 85 спорт федерациясы мен 50 ұйым қатысып, платформаны деректермен толтыру және функционалын тексеру жұмыстарын жүргізуде. Алынған ұсыныстар негізінде жекелеген модульдер жетілдіріледі.
Жобаның екінші кезеңінде электрондық жарыс хаттамаларын енгізу, автоматтандырылған статистикалық талдау жүйесін құру және бірқатар мемлекеттік қызметтерді проактивті цифрлық форматқа көшіру жоспарланып отыр. Бұл шешімдер әкімшілік рәсімдерді жеделдетіп, спортшылар мен басқарушы құрылымдар арасындағы өзара әрекеттесуді жаңа деңгейге шығармақ.
Министрлік бұл бастаманы Қазақстанда бірыңғай цифрлық спорт экожүйесін қалыптастыруға бағытталған маңызды қадам ретінде қарастырады. Жүйе спорт инфрақұрылымы, жарыстар мен нәтижелер туралы деректерді біріктіріп, саланы басқарудың тиімділігін арттыруға және халық үшін спорт қызметтерінің қолжетімділігін кеңейтуге мүмкіндік береді.
Ербол Мырзабосыновтың айтуынша, цифрлық трансформация спорт саласында ашықтықты күшейтіп, жастардың спортқа қызығушылығын арттыруға ықпал етеді. Осылайша, Қазақстан заманауи технологияларды пайдалана отырып, дене шынықтыру мен спорт жүйесін жаңғырту жолында нақты қадам жасап отыр.
